काठमाडौं । नेपाल आयल निगम लिमिटेडले साविकमा रहेको सिनामंगल स्थित हवाई इन्धन डिपो सार्ने भएको छ । उक्त डिपो काठमाडौं महानगरपालिका वडा नं. ८ गुह्येश्वरीस्थित नेपाली सेनाको गल्फ कोर्स भएको स्थानमा सारिने भएको हो ।

जसका लागि विस्तृत परियोजना प्रतिवेदन तयार पार्नको लागि त्रिभुवन विश्वविद्यालय ईन्जिनियरिङ्ग अध्ययन संस्थान (कन्सल्टेन्सी सेवा) पुल्चोकसँग २०८१ मङ्सिर ५ गते निगमको सम्झौता भएको थियो । बिहीबार कन्सल्टेन्सी सेवाद्वारा तयार पारिएको डिपिआर हस्तान्तरण गरिएको छ ।

निगमसँगको सम्झौता अनुसार त्रि. वि. ई. अ. संस्थान कन्सल्टेन्सी सेवाले निगमलाई डिपिआर प्रतिवेदन हस्तान्तरण गरेको छ । प्रस्तावित निर्माण हुने डिपो अत्याधुनिक तथा पूर्ण रूपमा स्वचालित एल३ लेभल अटोमेसन युक्त हुनेछ भने यस डिपोमा इन्धन भण्डारणको लागि हाल ३००० कि.लि का ५ वटा भर्टिकल ट्यांक निर्माण हुने र भविष्यमा भण्डारण क्षमता बढाउनको लागि समेत खाली स्थान निर्माण हुनेछ ।

यस परियोजना अन्तर्गत इन्धन लोडिङ/अनलोडिङका लागि क्रमशः ६ र ८ वटा बेहरु निर्माण हुने, अन्तराष्ट्रिय उडानका जहाजमा इन्धन भर्नको लागि ७ पीट हाइड्रान्ट रिफ्युलिङ सिस्टम तथा २ वटा रिफ्युलिङ डिस्पेन्चर पनि रहने छन् । डिपोमा अग्निसुरक्षाको लागि २१०० कि.लि क्षमताका २ वटा स्टाटि वाटर ट्यांक र पूर्ण स्वचालित फायर फाइटिङ सिस्टम समेत जडान हुने भएको छ ।

प्रस्तावित निर्माण हुने डिपोमा प्रशासनिक भवन, प्रयोगशाला भवन, मर्मत सम्भार यार्ड, लगायत डिपोको सुरक्षार्थ खटिने नेपाली सेनाको लागि अलग्गै भवनको समेत व्यवस्था रहनेछ । अन्तराष्ट्रिय स्तरका मापदण्डहरू एपीआई, आइएसडीको पूर्ण रुपमा पालना गरिने जनाइएको छ । निर्माण हुन लागेको यस डिपोको निर्माण लागत ६ अर्ब ५४ करोड २९ लाख ५ हजार ५७ रुपैयाँ २० पैसा अनुमान गरिएको छ ।

यसै आर्थिक वर्षको मङ्सिर महिनामा निर्माण कार्य सुरु गरी दुई वर्ष भित्रमा (२०८४ मङ्सिर) सम्ममा निर्माण सम्पन्न गरी डिपो सञ्चालन गर्ने निगमको योजना रहेको कार्यालय प्रमुख ई. प्रदिप कुमार यादवले जानकारी दिए ।